Ispaniyalik mutaxassis Xabi Alonso Londonning «Chelsi» klubi bosh murabbiyligiga nomzodlardan biri sifatida ko‘rilmoqda. Poytaxt klubi yangi mavsumdan jamoani boshqaradigan munosib mutaxassis izlash bilan band.

Insayder Fabrisio Romanoning bergan ma’lumotlariga ko‘ra, so‘nggi kunlarda «aristokratlar» bilan bog‘liq xabarlar ko‘paygan bo‘lsa-da, ispaniyalik murabbiy hozircha birorta klub bilan aniq muzokaralar olib bormagan. Manbaning ta’kidlashicha, «Bayer» va «Real Madrid» sobiq ustozi katta futbolga qaytishga hamda qiziqarli loyihalarni qabul qilishga ochiq, biroq ayni damda unda tayinli variantlar mavjud emas.

Eslatib o‘tamiz, «Chelsi» rahbariyati joriy yilning aprel oyida Liam Rosenyorni iste’foga chiqargan edi. Jamoa yangi mavsumni yangi murabbiy qo‘l ostida boshlashni rejalashtirgan.