Yarim himoyachi Xames Rodriges chorshanba, 13 may kungi o‘yindan so‘ng JCH-2026 final bosqichi oldidan Kolumbiya terma jamoasi yig‘iniga qo‘shilish uchun «Minnesota»ni tark etadi. Bu haqda ESPN o‘z manbasiga tayanib xabar bermoqda.
MLS muntazam chempionati doirasidagi «Kolorado»ga qarshi bahs 34 yoshli futbolchi uchun «Minnesota» tarkibidagi amaldagi shartnoma bo‘yicha so‘nggi o‘yin bo‘ladi. U fevral oyida jamoaga kelib, 2026 yilning 30 iyunigacha mo‘ljallangan va muddatini 2026 yil dekabrigacha uzaytirish imkoniyati bo‘lgan qisqa muddatli shartnoma imzolagan edi. «Minnesota» ushbu imkoniyatdan foydalanish-foydalanmasligi hozircha noma’lum.
Avvalroq Rodriges faoliyatini yakunlashi haqidagi mish-mishlarni rad etgan va Jahon chempionatidan keyin futboldan ketmoqchi emasligini tasdiqlagan edi.
«Qancha vaqt o‘ynay olishimni faqat o‘zim bilaman. O‘sha kun kelganida bu haqda e’lon qilaman, lekin o‘ylashimcha, oldinda hali yana bir necha yilim bor. Odamlar aytayotgan gaplarning barchasi yolg‘on», — dedi u «Ostin» bilan o‘yindan so‘ng.
Kolumbiya Jahon chempionatining «K» guruhida Portugaliya, O‘zbekiston va Kongo DR terma jamoalari bilan kuch sinashadi. Jamoa 17 iyun kuni Mexikoda Kongo DRga qarshi o‘yin bilan debyut qiladi.
2026 yilgi mavsumda Xames «Minnesota» safida 7 ta o‘yinda maydonga tushib, 2 ta golli uzatmani amalga oshirdi. U Amerika jamoasiga Meksikaning «Leon» klubidan o‘tgan edi.
