Londonning «Arsenal» klubi tajribali yarim himoyachisi, Daniya terma jamoasi a’zosi Kristian Nergor xalqaro miqyosdagi faoliyatini yakunlashga qaror qildi.
«Men terma jamoadagi ishtirokimni to‘xtatishga qaror qildim. Bir tomondan, bu juda qiyin qaror bo‘ldi, chunki men uchun jamoa qarorgohiga kelish, sheriklarim va murabbiylar shtabi bilan ko‘rishishdan ko‘ra yoqimliroq narsa yo‘q edi. Liq to‘la «Parken» stadionida qizil-oq libosda maydonga tushishni hamma narsadan ko‘proq yaxshi ko‘rardim. Shu bilan birga, men murabbiy Brayan Rimerning ishonchini his qildim. 2025 yilda Portugaliya ustidan qozonilgan g‘alaba faoliyatimdagi eng yuqori nuqta bo‘ldi — o‘sha sehrli oqshomda maydon markazida yetakchilik rolini o‘z zimmamga olgandim.
Endi bularning barchasi yakunlandi. Bundan buyon jamoani tarkibning bir qismi sifatida emas, balki oddiy muxlis sifatida qo‘llab-quvvatlayman. Bolalikdagi orzumni amalga oshirishda yordam bergan barcha futbolchilar, murabbiylar va muxlislarga rahmat», — deb yozadi 32 yoshli futbolchi o‘zining Instagram sahifasida.
Ma’lumot uchun, Kristian Nergor Daniya terma jamoasi safida 41 ta o‘yin o‘tkazib, 2 ta gol va 1 ta golli uzatmaga mualliflik qilgan. Shuningdek, u o‘z milliy jamoasi bilan 2021 yilgi Yevropa chempionatining yarim finaligacha yetib borgan.
