Fransiya terma jamoasi va "Real Madrid" klubi hujumchisi Kilian Mbappe shuhratga bo‘lgan munosabati haqida fikr bildirdi.

«Men optimist bo‘lishga harakat qilaman. Bu odatiy holat. Albatta, bu qiyin, chunki senda endi o‘zingga emas, balki hammaga tegishlidek his paydo bo‘ladi. Ammo bu — biz tanlagan hayot. Balki aynan shunday darajada emasdir, lekin baribir tanlaganmiz. Biz bunga rozi bo‘lganmiz. Millionlab insonlar senga minnatdorlik, e’tirof va mehr ko‘rsatayotgan bir paytda faqat salbiy tomonlarga o‘ralashib qolish qiyin. Shuning uchun shikoyat qilish nosamimiydek tuyuladi.

Men bu holatni har doim ham yaxshi boshqara olmaganman. Men juda yoshligimda mashhur bo‘lib ketganman. Ba’zi holatlarda boshqalarni tushunish uchun yetarlicha yetuklik va hamfikrlilikka ega emasdim. Endi esa odamlar ba’zan chegaradan oshib ketsa ham, ko‘proq tushunishga harakat qilyapman», — dedi Mbappe.

Joriy mavsumda Mbappe barcha musobaqalarda 41 ta uchrashuvda ishtirok etib, 41 ta gol va 6 ta golli uzatma muallifi bo‘ldi.