47 yoshli arbitr Bundesliganing 34-turidan o‘rin olgan «Bavariya» – «Kyoln» (5:1) uchrashuvida bosh hakamlik qildi. Referi o‘yindan oldin ham, keyin ham ko‘zyoshlarini tiya olmadi. Bahs startini bildiruvchi hushtak chalinishidan avval u bir necha bor: «Uh, qiyin. Juda qiyin», deb takrorladi.
«Buni ta’riflab berish mushkul. Bundesligadagi shuncha yillardan so‘ng, futbol oilasining bir bo‘lagi bo‘lib, endi uni tark etayotganingni anglash — aslo oson emas. Men cheksiz minnatdorman. Bu maxsus lahzalarni hech qachon unutmayman», — dedi Aytekin Sky efirida.
Aytekin 18 yil davomida yuqori darajadagi uchrashuvlarni boshqarib keldi. Germaniyalik hakam 2017 yilda Chempionlar ligasi 1/8 finali doirasidagi «Barselona» va «PSJ» o‘rtasidagi javob o‘yinidan (6:1) so‘ng katta mashhurlikka erishgan edi. O‘shanda kataloniyaliklar dastlabki o‘yindagi 0:4 hisobidagi mag‘lubiyatdan so‘ng keyingi bosqichga yo‘l olishgan edi.
