47 ёшли арбитр Бундеслиганинг 34-туридан ўрин олган «Бавария» – «Кёльн» (5:1) учрашувида бош ҳакамлик қилди. Рефери ўйиндан олдин ҳам, кейин ҳам кўзёшларини тия олмади. Баҳс стартини билдирувчи ҳуштак чалинишидан аввал у бир неча бор: «Уҳ, қийин. Жуда қийин», деб такрорлади.

«Буни таърифлаб бериш мушкул. Бундеслигадаги шунча йиллардан сўнг, футбол оиласининг бир бўлаги бўлиб, энди уни тарк этаётганингни англаш — асло осон эмас. Мен чексиз миннатдорман. Бу махсус лаҳзаларни ҳеч қачон унутмайман», — деди Айтекин Sky эфирида.

Айтекин 18 йил давомида юқори даражадаги учрашувларни бошқариб келди. Германиялик ҳакам 2017 йилда Чемпионлар лигаси 1/8 финали доирасидаги «Барселона» ва «ПСЖ» ўртасидаги жавоб ўйинидан (6:1) сўнг катта машҳурликка эришган эди. Ўшанда каталонияликлар дастлабки ўйиндаги 0:4 ҳисобидаги мағлубиятдан сўнг кейинги босқичга йўл олишган эди.