«Manchester Siti» hujumchisi Erling Xoland boy berilgan chempionlik keyingi mavsumda jamoa uchun qo‘shimcha turtki bo‘lishi kerakligini ta’kidladi.

APLning 37-turida «Man Siti» «Bornmut» bilan durang o‘ynadi (1:1) va bu natija «Arsenal»ga muddatidan oldin chempionlik unvonini naqd qilish imkonini berdi.

«Yakunda Premyer-ligadagi har bir o‘yin qiyin kechishi ma’lum bo‘ldi. Biz harakat qildik, ammo bu yetarli bo‘lmadi. Endi butun jamoa ushbu muvaffaqiyatsizlikdan motivasiya sifatida foydalanishi kerak. Biz g‘azablanishimiz, ichimizdagi olovni his qilishimiz shart, chunki bu ko‘rsatilgan natija yetarli emas.

Chempionlikni qo‘lga kirita olmaganimizga ikki yil bo‘ldi, lekin bu xuddi bir asrdek tuyulmoqda. Keyingi mavsumda shu yerda bo‘ladigan barcha futbolchilar ligada g‘olib chiqish uchun qo‘limizdan kelgan hamma ishni qilishga tayyormiz», – dedi Xoland.