«Barselona» vise-prezidenti Rafa Yuste jamoaning erishgan o‘sishi haqida gapirdi. U kataloniyaliklar og‘ir davrni boshdan kechirishgani, ammo bosqichma-bosqich barqaror rivojlanish modelini qurishga muvaffaq bo‘lishganini ta’kidladi:

«Biz ish boshlagan paytimizda, klubni qanday holatda kutib olishimizni tasavvur ham qilmagan edik. Uni hayotga qaytarish uchun juda qat’iy va keskin choralar ko‘rishimizga to‘g‘ri keldi. Rahbariyatning to‘g‘ri olib borgan ishi tufayli ushbu murakkab davr bugungi kunda quvonchga to‘la lahzalarga aylandi. Bugun «Barsa»ning kelajak uchun o‘z loyihasi bor. Biz kelgan paytda sport tuzilmasi butunlay izdan chiqqan, futbolchilar uchun xarajatlar haddan tashqari yuqori edi. Hamma narsani tartibga solish va maoshlar fondini qisqartirish oson kechgani yo‘q», — deb qayd etdi Yuste.

«Bu yil biz jamoani chempion qilish uchun 30 million yevro sarmoya kiritdik. Va bu boshqa klublar yuzlab millionlab investisiya kiritayotgan bir paytda sodir bo‘ldi».

Mavsum yakunlanishiga bir tur qolganda «Barselona» 94 ochko jamg‘argan holda turnir jadvalida peshqadamlik qilmoqda. Ikkinchi o‘rinda borayotgan «Real» hisobida esa 83 ochko mavjud.