Hujumchi Rafael Leau yozgi transferlar oynasida «Milan»ni tark etishi mumkin. Jurnalist Ekrem Konurning ma’lum qilishicha, portugaliyalik futbolchiga «Manchester Yunayted» va «Fenerbaxche» klublari qiziqish bildirmoqda.

Turkiya klubi portugaliyalik futbolchini o‘z safiga qo‘shib olish uchun kurashga qo‘shilgan bo‘lsa-da, uning katta maoshi transferni amalga oshirishda asosiy to‘siq bo‘lishi mumkin. O‘z navbatida, futbolchining o‘zi avvalroq unga qiziqish bildirgan «Barselona»dan rasmiy taklif kutmoqda.

Rafael Leau «Milan»ga 2019 yilda «Lill»dan 49 million yevro evaziga o‘tgan edi. Uning «rossonerilar» bilan amaldagi shartnomasi 2028 yilning 30 iyunigacha mo‘ljallangan. Joriy mavsumda hujumchi jamoa safida barcha musobaqalarda 30 ta o‘yinda maydonga tushib, 10 ta gol va 3 ta golli uzatmaga mualliflik qildi.