«Chelsi»ning sobiq bosh murabbiyi Enso Mareska «Manchester Siti»ni boshqaradi, deb xabar bermoqda insayder Fabrisio Romano.

Manbaga ko‘ra, 46 yoshli italiyalik mutaxassis «shaharliklar» bilan 2029 yilning yoziga qadar mo‘ljallangan shartnoma imzoladi. U kelasi mavsum oldidan jamoaning transfer ishlarida ham faol ishtirok etadi.

Eslatib o‘tamiz, 22 may kuni «Manchester Siti» Xosep Gvardiola mavsum yakunida jamoani tark etishini e’lon qilgan edi. Ispaniyalik mutaxassis 2016 yildan buyon klub bosh murabbiyi sifatida faoliyat yuritib kelayotgandi.

Mareskaning oxirgi ish joyi «Chelsi» bo‘lib, u 2026 yilning yanvarida londonliklar safini tark etgan edi. Enso London klubi bilan Konferensiyalar ligasi hamda klublar o‘rtasidagi jahon chempionatida zafar quchgan.

Shuningdek, italiyalik mutaxassis faoliyati davomida «Lester» va «Parma» jamoalarini ham boshqargan. 2022 yildan 2023 yilgacha esa u «Manchester Siti»da Xosep Gvardiolaning yordamchisi sifatida ishlagan.