Daniyalik darvozabon Kasper Shmeyxel faoliyatini yakunlashini ma’lum qildi. 39 yoshli futbolchi bu haqda TV2 telekanaliga bergan intervyusida aytib o‘tdi va bu qaror sog‘lig‘idagi muammolar tufayli qabul qilinganini tan oldi.

So‘nggi vaqtlarda Shotlandiyaning «Seltik» klubida to‘p tepgan darvozabon yelkasidagi jarohat tufayli mavsumning bahorgi qismini o‘tkazib yuborgan edi. Uning jamoa bilan shartnomasi shu yilning iyun oyida tugaydi. Shmeyxel bir nechta jarroh va mutaxassislar bilan maslahatlashganini, biroq ularning barchasi professional futbolga qaytishni tavsiya etmaganini ta’kidladi.

Kasper Shmeyxel faoliyati davomida «Manchester Siti» va boshqa qator klublarda o‘ynagan bo‘lsa-da, eng katta shuhratga «Lester» tarkibida erishgan. U «tulkilar» bilan birga 2015/16 yilgi mavsumda Angliya chempioni bo‘lgan. Shuningdek, darvozabon Daniya terma jamoasi safida 120 ta o‘yin o‘tkazgan.