«Barselona» darvozaboni Mark-Andre ter Shtegen yaqinlashib kelayotgan yozgi transferlar oynasida jamoasini o‘zgartiradi. Jurnalist Ferran Martinesning xabar berishicha, klub va futbolchi o‘rtasida hech qanday kelishmovchiliklar yo‘q – tomonlar birgalikdagi faoliyatni yakunlash uchun ayni munosib vaqt kelganiga to‘liq rozi bo‘lishgan.

Darvozabon hozirda faoliyatini davom ettirish bo‘yicha turli variantlarni ko‘rib chiqmoqda va u Ispaniyani tark etishga tayyor.

Mark-Andre ter Shtegen 2014 yildan buyon «Barselona» sharafini himoya qilib kelayotgan edi. U kataloniyaliklar safida barcha turnirlarda jami 423 ta o‘yin o‘tkazib, o‘z darvozasidan 416 ta gol o‘tkazib yuborgan. 34 yoshli futbolchining amaldagi shartnomasi 2028 yilgacha mo‘ljallangan bo‘lib, uning Transfermarkt portalidagi taxminiy narxi 4 million yevroni tashkil etadi.