«Barselona» Entoni Gordonni «Nyukasl»dan sotib olishi bosh murabbiy Xans-Diter Flikning «maxsus iltimosi»ga ko‘ra amalga oshirildi. Nemis mutaxassisi ingliz futbolchisining o‘tgan yil sentyabr oyida Chempionlar ligasi doirasidagi o‘zaro o‘yindagi (1:2) harakatlaridan lol qolgan edi. Bu haqida The Athletic nashri xabar bermoqda.

Manbaga ko‘ra, «Barselona» transfer oynasi rasman ochilgunga qadar katta xarajat qilishga tayyor edi. Buning uchta asosiy sababi bor. Birinchidan, joriy yilda La Liganing ish haqi limiti doirasida klubning imkoniyatlari kelasi yilgiga qaraganda ancha kengroq ekanligi anglab yetildi. Ikkinchidan, agar Gordon Jahon chempionatida o‘zini ko‘rsatsa, uning narxi yanada oshishi mumkin edi. Uchinchidan esa, «ko‘k-anorranglilar» Gordonga qiziqish bildirgan boshqa jamoalar bilan raqobatda yutqazishni istashmadi.

«Barselona» 29 may kuni Gordonning transferini e’lon qildi. Ingliz hujumchisi klub bilan besh yillik shartnoma imzoladi. Transferning umumiy summasi 80 million yevrodan oshishi aytilmoqda.