«Arsenal»ning sobiq bosh murabbiyi Arsen Venger londonliklarning Chempionlar ligasi finalida «PSJ»ga qarshi o‘yindagi imkoniyatlarini baholadi. Fransuz mutaxassisi jamoaning himoyada ishonchli o‘yin ko‘rsatishi evaziga kichik ustunlikka ega ekanini ta’kidladi.

«Futbol shunchaki fantastik, chunki u oldindan aytib bo‘lmaydigan o‘yin va ba’zida o‘yindan keyin nima uchun bunday natija qayd etilganini tushuntirib bo‘lmaydi. Bu esa istalgan narsa sodir bo‘lishi mumkinligini anglatadi. Ammo, mening fikrimcha, «Arsenal»da 60 ga 40 foizlik kichik ustunlik mavjud.

«Arsenal»ning asosiy kuchi — darvoza daxlsizligini saqlab qolish qobiliyatida, finalda esa bu juda muhim. O‘yin davomida senga imkoniyat albatta beriladi va o‘sha vaziyatda shafqatsiz bo‘lish kerak, sifatli futbolchilar esa buni uddalay oladi. «Arsenal» istalgan daqiqada xavfli bo‘la oladi», — dedi Venger.