«Liverpul» darvozaboni Alisson Beker klubda qolishga qaror qildi. Braziliyalik futbolchi «Yuventus»ning transfer nishoni hisoblanardi: mish-mishlarga ko‘ra, darvozabonning o‘zi yozgi transfer oynasida Turinga ko‘chib o‘tishga tayyor edi, biroq «qizillar» («Liverpul») bu bitimdan voz kechdi.

«ESPN Brasil» xabariga ko‘ra, hozirda vaziyat yakuniy oydinlik kasb etdi: Alisson klubda qolish va amaldagi shartnomasi yakuniga qadar o‘ynashga qaror qildi. 33 yoshli futbolchining ingliz grandi bilan kelishuvi keyingi yilning o‘rtalarigacha mo‘ljallangan. O‘tgan mavsumda Alisson «Liverpul» safida barcha musobaqalarda 35 ta o‘yin o‘tkazib, 37 ta gol o‘tkazib yubordi. Darvozabon mersisaydliklar sharafini 2018 yilning yozidan buyon himoya qilib kelmoqda.