Portugaliya terma jamoasi yarim himoyachisi Bernardu Silva jahon chempionati oldidan jamoadagi kayfiyat haqida gapirib berdi. Portugaliyaliklar hech qachon mundialda g‘olib chiqishmagan, biroq ular bo‘lajak turnirning asosiy favoritlaridan biri hisoblanishadi.
«Biz ishonch va qat’iyatga to‘lamiz. Maqsadimiz aniq – jahon chempionatida g‘alaba qozonish. Albatta, xuddi shunday ambisiyalarga ega boshqa jamoalar ham bor, lekin ulardan birortasini bizdan ustun deb ayta olmayman», — deya bayonot berdi «Manchester Siti»ning sobiq sardori Chiliga qarshi kechgan o‘rtoqlik uchrashuvidagi (2:1) g‘alabadan so‘ng.
JCH-2026 guruh bosqichida Portugaliya terma jamoasiga Kongo DR, O‘zbekiston va Kolumbiya jamoalari raqiblik qiladi. 10 iyun kuni Roberto Martines shogirdlari Nigeriyaga qarshi yana bir o‘rtoqlik uchrashuvini o‘tkazadi.
