Argentina terma jamoasi hujumchisi Xulian Alvares Jahon chempionati boshlanishidan avval safga qaytishga ulguradi. Madridning «Atletiko» klubi futbolchisi olgan jarohati sababli may oyining boshidan beri maydonga tushmayotgan edi.
Jurnalist Gaston Edulning xabar berishicha, 26 yoshli forvard Jahon chempionati guruh bosqichi 1-turidan o‘rin olgan Jazoirga qarshi o‘yinga qadar to‘liq sog‘ayib ulguradi. Mazkur bahs 17 iyun kuni bo‘lib o‘tadi.
Mundial startidan avval «albiseleste» (oq-ko‘klar) yana bitta o‘rtoqlik uchrashuvi o‘tkazishi kerak — ular 10 iyun kuni Islandiyaga qarshi maydonga tushishadi. Xulian Alvares Argentina terma jamoasi safida umumiy hisobda 51 ta o‘yin o‘tkazib, 14 ta gol va 4 ta golli uzatmani o‘z hisobiga yozdirib qo‘ygan.
