Italiyalik mutaxassis Fabio Grosso «Fiorentina» klubi bosh murabbiyi etib tayinlandi. Bu haqdagi rasmiy ma’lumot A Seriya vakilining rasmiy saytida e’lon qilindi.
48 yoshli murabbiyning «binafsharanglilar» bilan tuzgan mehnat shartnomasi 2028 yilning yoziga qadar mo‘ljallangan.
Grosso 2024 yildan beri «Sassuolo» klubini boshqarib kelayotgan edi. Bungacha u Fransiyaning «Lion», Italiyaning «Frozinone», «Breshiya», «Verona», «Bari» klublarida hamda «Yuventus»ning yoshlar jamoasida bosh murabbiy sifatida faoliyat yuritgan.
Yakunlangan A Seriya mavsumida «Fiorentina» Paolo Vanoli qo‘l ostida turnir jadvalida 15-o‘rinni egallab, quyi ligaga tushib ketishdan qutulib qolgan edi.
