Angliya terma jamoasining qanot himoyachisi Jed Spens jag‘ suyagi singanidan keyingi holati haqidagi savolga javob berdi. «Tottenxem» futbolchisi ushbu jarohatni 19 may kuni «Chelsi»ga qarshi kechgan bahsda raqib bilan to‘qnashib ketganda olgan edi.

Shifokorlar tomonidan sinish tashxisi qo‘yilganiga qaramay, Spens Angliya terma jamoasining 2026 yilgi Jahon chempionati uchun qaydnomasiga kiritildi. U musobaqada maxsus niqobda harakat qiladi.

«Bu juda dahshatli to‘qnashuv edi. Og‘riq kuchli bo‘ldi, lekin xayriyatki, men futbolni jag‘im bilan emas, oyoqlarim bilan o‘ynayman. Shu bolatda hammasi joyida. Biroz noqulaylik bor, albatta, lekin iloj qancha», — deya Spensning so‘zlaridan iqtibos keltirmoqda The Guardian nashri.

Angliyaliklar mundialni 17 iyun kuni Xorvatiyaga qarshi o‘yin bilan boshlashadi, shundan so‘ng Gana va Panama terma jamoalariga qarshi bahs olib borishadi.