Niderlandiya terma jamoasi bosh murabbiyi Ronald Kuman 2026 yilgi Jahon chempionati final bosqichi guruh bosqichi 1-turidan o‘rin olgan Yaponiyaga qarshi o‘yindagi durang (2:2) haqida fikr bildirdi.
«Turnir davomida o‘sib borishimiz kerak. Yaxshiroq o‘ynashimiz lozim. Albatta, biz ilk o‘yinda g‘alaba qozonishni afzal ko‘rgan bo‘lardik va buni kutgandik ham, chunki ikki marta hisobda oldinda bordik. Bu amalga oshmadi, lekin bu endi o‘yinimizni yetarlicha yaxshi bo‘lmagan deb hisoblaymiz degani emas. Menimcha, uchrashuvda ijobiy jihatlar anchagina bo‘ldi, shunday ekan, yo‘limiz faqat yuqoriga qarab ketadi.
Birinchi bo‘limda Yaponiya bizga oldingi chiziqda bosim o‘tkaza olmadi, balki bu bizga bo‘lgan hurmat yoki qo‘rquv tufaylidir, ammo hisobda ortda qola boshlagach, ular buni uddalashdi.
Biz birinchi golni urganimizdan keyin mudofaamiz qiyinchiliklarga duch kela boshladi. Shuningdek, qanotlarda bosim o‘tkazish bilan bog‘liq muammo ham yuzaga keldi. Ikkala gol o‘tkazib yuborilgan vaziyatda ham yomon himoyalandik.
G‘alaba qozona olmaganimizdan hafsalam pir bo‘ldi, bunga ikki bor hisobda oldinda borganimiz sababchidir. Ko‘pchilik Yaponiyaga past baho beradi, lekin yuzinchi marta aytyapman: agar ularni mensimasangiz, bu sizning muammongiz.
O‘yin oldidan Yaponiyaning kuchiga haddan tashqari yuqori baho berilgan deb o‘ylaysizmi? Keling, kim haq ekanligini ko‘rish uchun Jahon chempionati yakunigacha kutib turaylik», — deya murabbiyning so‘zlarini keltiradi ESPN nashri.
Ikkinchi turda, 20 iyun kuni Niderlandiya Shvesiyaga qarshi maydonga tushadi.
