Madridning «Real» klubi bosh murabbiyi Joze Mourinyo sardorlik bog‘ichini Kilian Mbappega topshirmoqchi. Bu haqda ijtimoiy tarmoqlarda Ispaniya top-klubi faoliyatini batafsil yoritib boruvchi Ignasio Sanches xabar bermoqda.
Manba bergan ma’lumotlarga ko‘ra, Mourinyo sardorlik bog‘ichini Federiko Valverde, Tibo Kurtua va Vinisius Juniordan olib qo‘yish niyatida. Ta’kidlanishicha, portugaliyalik mutaxassis ikki janubiy amerikalik futbolchini «haddan tashqari toksik (jamoa muhitiga salbiy ta’sir etuvchi)» deb hisoblagani uchun ulardan butunlay qutulmoqchi. Tibo Kurtuaga kelsak, Mourinyo sardorlik bog‘ichini darvozabonga ishonib topshirish fikridan yiroq.
Agar manbaga ishonadigan bo‘lsak, murabbiy Kilian Mbappeni jamoaning birinchi sardori etib tayinlashni rejalashtirmoqda, uning yordamchilari (vise-sardorlar) esa Antonio Ryudiger va Jud Bellingem bo‘lishi kerak.
