Yarim himoyachi Braim Dias katta ehtimol bilan faoliyatini "Real"da davom ettiradi.
Jurnalist Ruben Martinning bergan ma’lumotlariga ko‘ra, tomonlar yangi shartnoma bo‘yicha hali muzokaralarga kirishmagan bo‘lsa-da, futbolchi va Madrid klubining istagi bir xil. "Qaymoqranglilar" ham, marokashlik futbolchi ham hamkorlikni davom ettirish niyatida, shu sababli yangi bitim imzolanishi shunchaki vaqt masalasidir.
Braim Dias 2019 yilda "Manchester Siti"dan "Real"ga 17 million yevro evaziga o‘tgan edi. Uning amaldagi shartnomasi 2027 yilning 30 iyuniga qadar mo‘ljallangan. 2025/26 yilgi mavsumda yarim himoyachi Madrid klubi safida barcha turnirlarda 42 ta uchrashuvda maydonga tushib, ikkita gol urdi va to‘qqizta golli uzatmani amalga oshirdi.
