Braziliya terma jamoasi sardori Markinyos Jahon chempionati 1/16 finalidan o‘rin olgan Yaponiyaga qarshi bo‘lajak uchrashuvdan kutilayotgan fikrlari bilan o‘rtoqlashdi va jamoaning o‘yinga bo‘lgan kayfiyati haqida gapirdi.

«Shubhasiz, Yaponiyaga qarshi bahs biz uchun eng o‘ziga xos o‘yin bo‘ladi. Bu juda qiyin uchrashuv bo‘ladi, ammo biz tayyormiz. Mashg‘ulotlar o‘tkazdik, raqibni tahlil qildik va o‘yin uchun reja tayyorladik.

Yaponiya terma jamoasini to‘g‘ri zararsizlantira olishimiz kerak – bu ushbu bosqichga loyiq tarzda yetib kelgan juda kuchli jamoa. Shuningdek, ko‘p narsa o‘z o‘yinimizga bog‘liq ekanini ham tushunib turibmiz.

So‘nggi o‘yinlarda o‘sishga erishdik. Balki, turnirni unchalik yaxshi boshlamagandirmiz, lekin ikkinchi o‘yinda yaxshiroq, uchinchisida esa undan ham kuchliroq o‘ynadik. Endi bor tajribamizdan foydalanish muhim.

Hozir butunlay boshqa turnir boshlanyapti. Guruh bosqichi — bu alohida masala, u yerda asosiysi pley-offga chiqish edi. Chiqib ketish (pley-off) o‘yinlari esa yangi musobaqadir. Qadamma-qadam harakat qilish lozim.

Avvalgi Jahon chempionatidagi shaxsiy tajribamizdan kelib chiqib, har bir vaziyatda maksimal darajada diqqatni jamlash va o‘yinning har bir detaliga e’tibor berish qanchalik muhimligini bilamiz. Biz aynan shunday yo‘l tutamiz», – dedi Markinyos.

1/8 finalda Yaponiya — Braziliya juftligi g‘olibi Norvegiya yoki Kot-d’Ivuar terma jamoasiga qarshi maydonga tushadi.