«Manchester Siti» klubi «Lester»ning 16 yoshli hujumchisi Jeremi Mongaga qiziqish bildirmoqda. Bu haqda BBC nashri xabar bermoqda.

Manbaning bergan ma’lumotiga ko‘ra, futbolchining rivojlanishini uzoq vaqtdan beri kuzatib kelayotgan «shaharliklar» yaqindagina transfer ehtimoli bo‘yicha dastlabki so‘rovni amalga oshirishgan. Ayni paytda futbolchi bilan muzokaralarda hammadan ko‘ra Londonning «Arsenal» klubi ilgarilab ketgan. Shuningdek, Mongaga «Brentford» tomonidan ham ma’lum darajada qiziqish bor.

Iyul oyida hujumchi 17 yoshni qarshi oladi. Avvalroq u «Lester» akademiyasi bilan bir yillik shartnoma imzolagan edi va bu kelishuv tez orada avtomatik tarzda uning birinchi professional shartnomasiga aylanishi kerak. Transfer amalga oshgan taqdirda, unga da’vogar bo‘layotgan klublar tovon puli to‘lashlariga to‘g‘ri keladi. «Lester» o‘z tarbiyalanuvchisi uchun kamida 11,7 million yevro olishni umid qilmoqda.

Yosh bo‘lishiga qaramay, Monga «tulkilar»ning asosiy jamoasi safida 37 ta o‘yinda maydonga tushishga ulgurdi. U Maks Douman va Itan Nvaneridan keyin APL tarixidagi uchinchi eng yosh futbolchi hisoblanadi.