30 yoshli yarim himoyachi Joau Palinya «Tottenxem»dagi ijara muddati yakunlanib, ortga qaytganidan so‘ng «Bavariya»da qoladi. Bu haqda taniqli jurnalist Florian Plettenberg xabar bermoqda.
Manbaning bergan ma’lumotlariga ko‘ra, «shporlar» Sandro Tonali va Mateush Fernandeshni sotib olganidan keyin, Palinya bo‘yicha bitimdan voz kechishgan. 30 yoshli xavbekka qiziqish bildirgan «Sporting» klubi ham «Bavariya»ning katta moliyaviy talablari tufayli uni sotib olishi amrimahol.
Yakunlangan mavsumda Palinya «Tottenxem» tarkibida barcha turnirlarda 45 ta o‘yinda maydonga tushib, 7 ta gol urdi va 3 ta golli uzatmani amalga oshirdi.
Portugaliyalik futbolchining «Bavariya» bilan amaldagi mehnat shartnomasi 2028 yilning o‘rtalariga qadar mo‘ljallangan.
