"Bornmut"ning markaziy yarim himoyachisi Aleks Skott katta ehtimol bilan yozgi transfer oynasida jamoani tark etmaydi. Bu haqda TEAMtalk nashri xabar bermoqda.

Manbaning bergan ma’lumotlariga ko‘ra, bundan oldinroq "olchalar" "Arsenal"ning Skott bo‘yicha bergan taklifini rad etishgan, chunki ular o‘z futbolchisini saqlab qolmoqchi. Ta’kidlanishicha, klub "Arsenal", "Liverpul" va "Manchester Yunayted"ga 22 yoshli xavbek shu yozda sotilmasligini aniq va ravshan bildirgan. Yaqin vaqt ichida "Bornmut" o‘z futbolchisi bilan yangi uzoq muddatli shartnoma borasida muzokaralarni boshlashni rejalashtirmoqda.

2025/26 yilgi mavsumda Skott barcha turnirlarni hisobga olgan holda 39 ta uchrashuvda maydonga tushib, 4 ta gol urdi va o‘z hisobiga 1 ta golli uzatmani yozdirib qo‘ydi.

Transfermarkt portali ma’lumotlariga ko‘ra, Skottning bozor qiymati 50 million yevroni tashkil etadi.