Shveysariya terma jamoasi yarim himoyachisi Granit Jaka yozgi transfer oynasida «Sanderlend»ni tark etmaydi. Bu haqda The Athletic xabar berdi.

Manba ma’lumotiga ko‘ra, Londonning «Chelsi» klubi 33 yoshli futbolchi uchun 8 million funt sterling (taxminan 9,2 million yevro) taklif qilgan. Biroq «Sanderlend» bu taklifni yetarli deb hisoblamagan va rad etgan.

Shundan so‘ng o‘tkazilgan muzokaralarda Jaka klubda qolishga qaror qilganini tasdiqladi. Shveysariyalik yarim himoyachi ayni paytda jamoaning eng muhim futbolchilaridan biri sifatida baholanmoqda.

Qayd etilishicha, «Chelsi» bosh murabbiyi Xabi Alonso Jakani o‘z jamoasida ko‘rishni shaxsan xohlagan. Ikkisi avval «Bayer»da birga ishlagan.

Granit Jaka 2025 yil yozida «Bayer»dan «Sanderlend»ga bonuslar bilan birga 17,5 million funt sterlinggacha bo‘lgan transfer evaziga o‘tgan edi.

2025/2026 yilgi mavsumda u Angliya Premyer-ligasida 36 ta o‘yin o‘tkazib, «Sanderlend»ning chempionatni 7-o‘rinda yakunlashi va Yevropa ligasi yo‘llanmasini qo‘lga kiritishida muhim hissa qo‘shdi.