Braziliya milliy terma jamoasi bosh murabbiyi Karlo Anchelotti Jahon chempionati — 2026ning 1/8 finalidan o‘rin olgan Norvegiyaga qarshi bahs oldidan jamoa yulduzi Neymarning jismoniy holati haqida to‘xtaldi.
«Neymar butun o‘yin davomida maydonda harakat qilishga qodir. U zaxira o‘rindig‘ida o‘tirishga aslo rozi bo‘lmaydi, haqiqiy professionaldek mehnat qilmoqda va a’lo darajada shug‘ullanyapti. Jamoada uni juda qadrlashadi va hurmat qilishadi. Neymar terma jamoa uchun o‘ta muhim figura. Men uning mehnatidan mutlaqo qoniqyapman», — deya italiyalik mutaxassisning so‘zlarini keltiradi Globo Esporte.
Eslatib o‘tamiz, Braziliya va Norvegiya terma jamoalari o‘rtasidagi uchrashuv yakshanba, 5 iyul kuni Nyu-Yorkdagi stadionda bo‘lib o‘tadi. Bosh hakamning start hushtagi Toshkent vaqti bilan 6 iyulga o‘tar kechasi soat 01:00 da chalinadi.
