Angliya terma jamoasining sobiq futbolchisi Gari Lineker «uch sherlar»ning markaziy hujumchisi Xarri Keynga nima yetishmayotganini ma’lum qildi.
Ekspertning fikricha, 32 yoshli Keyn ingliz futboli tarixidagi eng yaxshi futbolchi hisoblanadi. Biroq Linekerning hisoblashicha, uning hali o‘sadigan jihatlari bor.
«Uning to‘pni qabul qilishi va nazorat qilishi, uzatmalarining aniqligi hamda o‘yinni ko‘ra bilishi — shunchaki dahshatli. Xarrida hamma narsa bor. Unga yetishmayotgan yagona jihat — bu, ehtimol, biroz ko‘proq tezlikdir», — deya Linekerning so‘zlarini keltiradi Mundo Deportivo.
Keyn Angliya terma jamoasining JCH-2026 dagi to‘rtta uchrashuvida 5 ta gol urishga ulgurdi. Yaqindagina «Bavariya» hujumchisi Linekerning jahon chempionatlarida terma jamoa safida gol urish bo‘yicha rekordini yangilagan edi.
