Jahon chempionatining 1/16 final bosqichidan o‘rin olgan bahsda Kabo-Verde terma jamoasi Argentina terma jamoasidan mag‘lubiyatga uchradi (qo‘shimcha vaqtlarda 2:3). «Arsenal» va «Barselona» klublarining sobiq hujumchisi Tyerri Anri bo‘lib o‘tgan uchrashuv haqidagi taassurotlari bilan o‘rtoqlashdi.
«Bu Kabo-Verde tomonidan ko‘rsatilgan tarixiy o‘yin bo‘ldi. Maydonda guvohi bo‘lganimiz shuni isbotlaydiki, agar o‘zingga ishonsang, har qanday narsaning iloji bor. Yakunda ular bu uchrashuvda mag‘lub bo‘lishdi, biroq qalblarimizni zabt etishdi. Bu shunchaki aql bovar qilmas darajada ajoyib edi», — deya Anrining so‘zlarini keltiradi Goal.com nashri.
JCH-2026 ning 1/8 finali doirasida Argentina terma jamoasi Avstraliyani penaltilar seriyasida musobaqadan chiqarib yuborgan Misr terma jamoasiga qarshi bahs olib boradi.
