Fransiya terma jamoasi hujumchisi Kilian Mbappe Jahon chempionatining 1/4 finali doirasidagi Marokashga qarshi bo‘lajak o‘yin haqidagi savolga javob berdi.
Fransuzlar 1/8 final bosqichida Mbappening penaltidan urgan goli evaziga Paragvayni minimal (1:0) hisobda mag‘lub etishdi. Avvalroq marokashliklar Kanada ustidan 3:0 hisobida yirik g‘alabaga erishgan edilar.
«O‘ylaymanki, Hakimiy menga yozib bo‘lgan. Marokash — juda kuchli jamoa, biz bor e’tiborimizni qaratishimiz kerak. Ularga qarshi o‘ynash yoqimli bo‘ladi», — dedi Madridning «Real» klubi forvardi o‘yindan keyingi intervyusida.
Uchrashuv 9 iyul kuni bo‘lib o‘tadi. O‘tgan mundialda Fransiya va Marokash terma jamoalari yarim finalda to‘qnash kelishgan — o‘shanda «uch ranglilar» 2:0 hisobida g‘alaba qozonishgan edi.
