Janubiy Koreya milliy jamoasining sobiq bosh murabbiyi Hong Myon Bo Jahon chempionatidan qaytganidan ikki kun o‘tib, AQSHga jo‘nab ketgan. Bu haqda MBC telekanalida xabar berilgan.

Manbaga ko‘ra, 2 iyul kuni koreyalik mutaxassis InchHong xalqaro aeroportidan Los-Anjelesga uchib ketgan. U jurnalistlar bilan suhbatda turnirni erta tark etishga sabab sifatida ko‘rsatilayotgan milliy jamoa ichidagi parchalanish haqidagi mish-mishlarni qat’iyan rad etdi. Shuningdek, Hong Myon Bo Janubiy Koreya futbol federasiyasi faoliyati yuzasidan o‘tkazilishi kutilayotgan tekshiruvlarda ishtirok etishi ehtimoli bo‘yicha ham munosabat bildirdi.

“Buni bilmayman. Qachon qaytishim ham noma’lum. Noliydigan hech narsam yo‘q. Bosh murabbiy sifatida barcha mas’uliyatni o‘z zimmamga olishim shart. Natijamiz biz olib borgan tayyorgarlikdan ko‘ra ancha yomonroq bo‘lgani achinarli holat”, deydi murabbiy.

Janubiy Koreya milliy jamoasi JCH-2026 turnirida A guruhida 3 ochko to‘plab, uchinchi o‘rinni egalladi va pley-off bosqichiga chiqa olmadi. Shundan so‘ng milliy jamoa ustozi iste’foga chiqishini e’lon qildi. Mamlakat prezidenti Li Je Myon jamoaning JCH-2026 dagi omadsizligidan so‘ng davlat miqyosida tergov boshlash tashabbusi bilan chiqdi.

Jamoa Seulga yetib kelishidan avval, internetda murabbiyga nisbatan o‘lim tahdidlari paydo bo‘lgani sababli, rasmiylar xavfsizlik choralarini kuchaytirdi va aeroportga 100 dan ortiq polisiya xodimlarini jalb qildi. 30 iyun kuni milliy jamoa qaytib kelganida, parvoz kech tunda amalga oshirilganiga qaramay, InchHong aeroporti chiqishida jamoani 200 ga yaqin kishi kutib oldi. Muxlislar futbolchilarni hushtakbozliklar bilan qarshi oldi va “Hong Myon Bo, yo‘qol!” deya hayqirdi. Ulardan biri esa “Koreys futboli o‘ldi” degan yozuv tushirilgan plakatni ko‘tarib olgan edi.

Ma’lumot o‘rnida, 57 yoshli Hong Myon Bo milliy jamoani 2024-yildan buyon boshqarib kelayotgan edi. Mutaxassisning shartnomasi 2027-yilgi Osiyo Kubogi yakuniga qadar mo‘ljallangan edi.