Braziliya terma jamoasi vingeri Vinisius Junior Jahon chempionati 1/8 finalidan o‘rin olgan va mag‘lubiyat (1:2) bilan yakunlangan Norvegiyaga qarshi o‘yinda Brunu Gimaraesning penaltidan unumli foydalana olmagani haqidagi fikrlari bilan o‘rtoqlashdi.

Braziliyaliklar uchrashuvning 14-daqiqasidayoq hisobda oldinga chiqib olishlari mumkin edi, biroq «nuqta»ga yaqinlashgan «Nyukasl» yarim himoyachisi o‘z imkoniyatini boy berdi. Ko‘pchilik 11 metrlik jarima zarbasini Vinisius ijro etishini kutgandi, ammo bosh murabbiy Karlo Anchelottining so‘zlariga ko‘ra, u hatto dastlabki beshta nomzod ro‘yxatida ham bo‘lmagan.

«Penalti tepuvchi futbolchi o‘yindan oldin aniqlanadi. Murabbiy Brununi tanlagandi, u so‘nggi kunlardagi mashg‘ulotlarda o‘zini juda yaxshi ko‘rsatgandi. Afsuski, u gol ura olmadi, ammo bu uning terma jamoadagi faoliyatiga hech qanday salbiy ta’sir qilmaydi deb umid qilaman. O‘zimga kelsak, men hech qachon mas’uliyatdan qochmayman — doim jamoa manfaatlari uchun harakat qilaman. Bugun maydonda bo‘lganlar ichida Brunu eng yaxshi penaltichi edi», — deya Vinisiusning so‘zlarini keltiradi Brasil Football nashri.

O‘yinning eng so‘nggi daqiqalarida Braziliya Neymarning sa’y-harakatlari bilan penaltini baribir golga aylantirdi, biroq allaqachon kech bo‘lgandi — bungacha Erling Xoland dubl qayd etib ulgurgandi.