«Monako» klubining 24 yoshli vingeri Magnes Akliush «Pari Sen-Jermen»ga o‘tishga bir qadam yaqinlashdi.
«RMC Sport» bergan ma’lumotlarga ko‘ra, «PSJ» Magnes Akliush bilan besh yillik shartnoma borasida kelishuvga erishgan. Manbaning ta’kidlashicha, futbolchi hamisha Fransiyaning eng yirik klubiga o‘tishni orzu qilib kelgan.
Qayd etilishicha, parijliklar allaqachon «Monako» bilan muzokaralarni boshlab yuborishgan. Mamlakat chempionlari Akliush uchun qancha to‘lashi hozircha noma’lum, biroq avvalroq transfer summasi 70 million yevroni tashkil qilishi mumkinligi haqida xabarlar tarqalgan edi.
Ortda qolgan mavsumda Akliush barcha musobaqalarni hisobga olgan holda 43 ta uchrashuvda maydonga tushdi, 7 ta gol urdi va 11 ta golli uzatmaga mualliflik qildi.
