«Atalanta» yarim himoyachisi Ederson hamon «Manchester Yunayted»da paydo bo‘lishi mumkin.

«Qizil iblislar» allaqachon Italiya klubi va futbolchining o‘zi bilan kelishuvga erishgan edi, biroq tibbiy ko‘rik jarayonida o‘yinchining tizzasida muammolar aniqlangach, o‘tish jarayoni to‘xtab qoldi. Vaziyat jiddiy tus olgan bo‘lsa-da, transfer hali butunlay barbod bo‘lmagan: jurnalist Tayron Marshallning xabar berishicha, «MYU» hamon Edersonni xarid qilish imkoniyatini ko‘rib chiqmoqda. Ingliz grandi rahbariyati transferni boshqa shartlar asosida rasmiylashtirishga urinib ko‘rish uchun «Atalanta» bilan yangi muzokaralar o‘tkazadi.

Avvalroq, 27 yoshli futbolchi mankunianliklarga taxminan 45 million yevroga tushishi xabar qilingan edi.