Ispaniya terma jamoasi himoyachisi Emerik Laport jahon chempionati finalida Argentinaga qarshi o‘yin oldidan hakamlik borasidagi fikrlari bilan o‘rtoqlashdi. 32 yoshli futbolchi jurnalistlar bilan hakamlar ishini muhokama qilar ekan, finaldagi raqibiga alohida to‘xtalib o‘tdi.

«So‘nggi o‘yinlarda bizni chindan ham hayratda qoldiradigan holatlarni ko‘rdik. Ba’zi voqealar shunchaki e’tiborsiz qoldirildi. Ayniqsa, Argentina terma jamoasi bilan bog‘liq vaziyatlarda — ular o‘zlarining qo‘pol o‘yinlari orqali raqibga «xabarlar» yuborishadi. Bunday darajadagi turnirlarda bunga yo‘l qo‘yib bo‘lmaydi. Hakamning muhim vazifasi — bunday vaziyatlarni nazorat ostida ushlab turishdir.

Biz turnir boshidan beri o‘zimizni ma’lum doirada tutamiz — jamoamiz raqibni uradigan yoki qo‘pollik qiladiganlar toifasiga kirmaydi. Finalga ham xuddi shunday kayfiyat bilan yondashishimiz kerak. Hakamga ko‘p narsa bog‘liq bo‘ladi», — deya Laportning so‘zlarini keltiradi AlbicelesteTalk.