Испания терма жамоаси ҳимоячиси Эмерик Лапорт жаҳон чемпионати финалида Аргентинага қарши ўйин олдидан ҳакамлик борасидаги фикрлари билан ўртоқлашди. 32 ёшли футболчи журналистлар билан ҳакамлар ишини муҳокама қилар экан, финалдаги рақибига алоҳида тўхталиб ўтди.
«Сўнгги ўйинларда бизни чиндан ҳам ҳайратда қолдирадиган ҳолатларни кўрдик. Баъзи воқеалар шунчаки эътиборсиз қолдирилди. Айниқса, Аргентина терма жамоаси билан боғлиқ вазиятларда — улар ўзларининг қўпол ўйинлари орқали рақибга «хабарлар» юборишади. Бундай даражадаги турнирларда бунга йўл қўйиб бўлмайди. Ҳакамнинг муҳим вазифаси — бундай вазиятларни назорат остида ушлаб туришдир.
Биз турнир бошидан бери ўзимизни маълум доирада тутамиз — жамоамиз рақибни урадиган ёки қўполлик қиладиганлар тоифасига кирмайди. Финалга ҳам худди шундай кайфият билан ёндашишимиз керак. Ҳакамга кўп нарса боғлиқ бўлади», — дея Лапортнинг сўзларини келтиради AlbicelesteTalk.
