«Liverpul» 17 yoshli kolumbiyalik yarim himoyachi Samuel Martinesning «Atletiko Nasyonal»dan transferini yakunlashga yaqin turibdi.

Jurnalist Florian Plettenbergning xabar berishicha, futbolchi shartnoma imzolashdan oldin tibbiy ko‘rikdan o‘tish uchun allaqachon Angliyaga jo‘nab ketgan.

Ma’lum qilinishicha, transfer summasi 1 million dollarni tashkil qiladi, shuningdek, kolumbiyalik klub futbolchining kelgusi sotuvidan ma’lum foizni o‘zida saqlab qoladi. Muvaffaqiyatli tibbiy ko‘rikdan so‘ng, Martines «Liverpul» bilan besh yillik shartnoma imzolaydi.

Yarim himoyachi ingliz klubi safiga voyaga yetganidan so‘ng rasman qo‘shilishi mumkin. Futbolchi kelasi yilning 5 aprelida 18 yoshga to‘ladi va shundan so‘ng transfer kuchga kiradi.

Samuel Martines hali «Atletiko Nasyonal»ning asosiy jamoasida debyut qilmagan. Xalqaro miqyosda u Kolumbiya U-17 terma jamoasida o‘ynagan va ular safida oltita rasmiy o‘yinda maydonga tushgan.