Niderlandiyaning «Ayaks» klubi «Yuventus»dan hujumchi Diyego Punyo o‘tganini e’lon qildi. Tomonlar 20 yoshli futbolchini bir mavsumga ijaraga olish bo‘yicha kelishib olishdi, deb xabar beradi Amsterdam klubining rasmiy sayti.
Shartnomada futbolchini sotib olish huquqi ham ko‘zda tutilgan. Transfermarkt portali tomonidan bozor qiymati 400 ming yevroga baholangan italiyalik hujumchi yangi klubida o‘rinbosarlar jamoasida to‘p tepadi.
Punyo «Yuventus» akademiyasi tarbiyalanuvchisi hisoblanadi. Forvard Turinliklarning asosiy jamoasidagi yagona o‘yinini 2024 yil 1 dekabr kuni A Seriya doirasida «Lechche»ga qarshi o‘tkazgan.
O‘tgan mavsumda yoshlar o‘rtasidagi musobaqalarda maydonga tushgan o‘yinchi 21 ta bahsda 8 ta gol urdi va 3 ta golli uzatmani amalga oshirdi.
