«PSJ» vinger Bredli Barkolaning ehtimoliy transferini 170 million yevroga baholamoqda. Parij klubi Morgan Rojersning «Chelsi»ga (138 mln yevro) va Elliot Andersonning «Manchester Siti»ga (135 mln yevro) amalga oshirgan transferlarini o‘zi uchun mo‘ljal qilib olgan. Bu haqda jurnalist Ben Djeykobs X ijtimoiy tarmog‘idagi sahifasida xabar beradi.

Manbaning ma’lumotiga ko‘ra, 170 million yevrolik summa Barkolyaning ketma-ket ikki marta Chempionlar ligasida g‘alaba qozongani, 2026 yilgi Jahon chempionatida kuchli o‘yin ko‘rsatgani va uning 23 yoshda ekanini inobatga olgan holda belgilangan. «PSJ» vingeriga qiziqish bildirayotgan «Liverpul» esa narxni tushirishga umid qilmoqda.

Fransiya giganti bosh murabbiyi Luis Enrike jamoada faqat klubga sadoqatli futbolchilarni ko‘rishni istaydi va hech kimga asosiy tarkibdan kafolatlangan o‘rin va’da qilmaydi.

Oldinroq jurnalist Fabrisio Romano Barkolyaning 2028 yilning yozida yakuniga yetadigan shartnomani uzaytirishdan voz kechgani haqida xabar bergan edi.