Osiyo Futbol Konfederasiyasi (OFK) Ijroiya qo‘mitasi qit’aning eng nufuzli klublar turniri — Elit Osiyo Chempionlar Ligasi (Elit OCHL) musobaqasining keyingi uchta mavsumi final bosqichlariga mezbonlik qilish huquqini rasman Saudiya Arabistoniga topshirdi.
2024/2025-yilgi mavsum arafasida musobaqa tizimi tubdan isloh qilingan va uning hal qiluvchi uchrashuvlari (chorak final, yarim final va final) bitta markazlashgan davlatda o‘tkazilishi belgilangan edi. Dastlabki ikkita tajriba ham aynan Saudiya Arabistonida bo‘lib o‘tdi.
Qiziq tomoni, Jidda shahri mezbonlik qilgan har ikkala mavsumda mahalliy “Al-Ahli” klubining qo‘li baland keldi. Jamoa 2025-yilda Yaponiyaning “Kavasaki Frontale” klubini taslim etgan bo‘lsa, shu yilning may oyida o‘tgan hal qiluvchi finalda yana bir yapon klubi — “Machida Zelviya”ni qo‘shimcha bo‘limlarda 1:0 hisobida mag‘lub etib, ketma-ket ikkinchi bor chempionlikni tantana qildi.
Qit’aning yetakchi chempionatlari g‘oliblarini o‘zida jamlaydigan kelgusi mavsumdan e’tiboran liga bosqichida jamoalar soni kengaytiriladi. Endilikda musobaqada 24 ta emas, balki 32 ta klub ishtirok etadi.
Yangi mavsum taqvimi quyidagicha belgilangan:
Saralash o‘yinlari starti: 11 avgust
Liga bosqichiga qur’a tashlash (Kuala-Lumpur): 18 avgust
Asosiy bosqich o‘yinlari boshlanishi: 14 sentyabr
Ma’lumot o‘rnida, Elit Osiyo Chempionlar Ligasi turnirining 2026/2027-yilgi mavsumida O‘zbekiston sharafini Farg‘onaning “Neftchi” klubi himoya qiladi. Toshkentning “Paxtakor” jamoasi esa o‘z yurishini saralash bosqichidan boshlaydi. Agar “sherlar” undan muvaffaqiyatli o‘tsa, ular ham musobaqaning asosiy bosqichiga yo‘llanma oladi.
