Portugaliya terma jamoasi va Turinning «Yuventus» klubi vingeri Fransishku Konseysau faoliyatini Angliya Premyer-ligasida davom ettirish variantiga ega. Bu haqda insayder Nikolo Skira ijtimoiy tarmoqlar orqali xabar berdi.

Jurnalistning ma’lumotlariga ko‘ra, «Manchester Yunayted» yarim himoyachini o‘z safiga qo‘shib olishga qiziqish bildirmoqda. «Qizil iblislar» futbolchi bo‘yicha ma’lumot so‘rashgan.

Konseysauning «keksa sinyora» bilan shartnomasi 2030 yilning iyun oyi oxirigacha mo‘ljallangan. 23 yoshli portugaliyalik futbolchining bozor qiymati 30 million yevroni tashkil etadi.

A Seriyaning o‘tgan mavsumida Fransishku 31 ta uchrashuvda maydonga tushib, 3 ta gol urdi va 5 ta golli uzatmaga mualliflik qildi.