FIFA prezidenti Djanni Infantinoning Jahon chempionati va boshqa turnirlar huquqlarini xususiy investorlarga topshirish haqidagi taklifi jiddiy qarshiliklarga sabab bo‘ldi. UYEFA agar bu g‘oyadan voz kechilmasa, Yevropa terma jamoalari FIFA tomonidan o‘tkaziladigan barcha turnirlarni, xususan, Jahon chempionatini boykot qilishini allaqachon e’lon qildi.
El Español nashriga tayangan holda The Touchline tarqatgan xabarga ko‘ra, agar Djanni Infantino o‘z taklifini qaytarib olmasa, Ispaniya va Portugaliya 2030 yilgi Jahon chempionatini qabul qilishdan voz kechadi. Marokashning bu masaladagi pozisiyasi hozircha noma’lumligicha qolmoqda.
Eslatib o‘tamiz, 2030 yilgi Mundialni Ispaniya, Portugaliya va Marokash birgalikda qabul qilishi kerak edi. Bundan tashqari, turnirning 100 yillik yubileyi munosabati bilan ochilish o‘yinlari Urugvay, Paragvay va Argentinada o‘tkazilishi rejalashtirilgan.
