«Aston Villa» darvozaboni Emiliano Martines yozgi transfer oynasida klubni tark etishni rejalashtirmayapti.
Bu haqda argentinalik golkiperning agenti Gustavo Goniga tayanib Sky Sports xabar bermoqda. Futbolchi vakilining so‘zlariga ko‘ra, 33 yoshli futbolchi «Manchester Yunayted», «Yuventus» va «Inter» tomonidan qiziqishlar bo‘lishiga qaramay, «Aston Villa» rahbariyatidan uni qo‘yib yuborishlarini hech qachon so‘ramagan.
Agentning ta’kidlashicha, Martines faqat ikkala tomon ham bundan manfaatdor bo‘lgan taqdirdagina «Aston Villa»ni tark etadi.
Emiliano 2020 yildan beri «Aston Villa» safida to‘p surib kelmoqda. U klub safida 256 ta o‘yin o‘tkazgan. Muhammad Saloh singari o‘z jamoasining muhim figurasiga aylangan darvozabonning amaldagi shartnomasi 2029 yilgacha mo‘ljallangan.
