«Manchester Yunayted» yarim himoyachisi Meyson Maunt «PSJ»ga qarshi nazorat uchrashuvida jarohat tufayli maydonni erta tark etganiga qaramay, jamoa bilan Dublinga yo‘l oldi.

BBC jurnalisti Saymon Stoun ma’lumotiga ko‘ra, Shvesiyadagi yig‘inda ishtirok etmagan futbolchilar bugun Dublinda jamoaning qolgan a’zolariga qo‘shilgan. Maunt esa «PSJ»ga qarshi uchrashuvdan so‘ng to‘g‘ridan-to‘g‘ri jamoa bilan birga Irlandiyaga borgan.

27 yoshli futbolchi Yevropa chempionlariga qarshi bahsni asosiy tarkibda boshlagan, ammo 20-daqiqada maydonda jarohat olgach, o‘yinni davom ettira olmagan. Uning o‘rniga Tayler Fletcher maydonga tushgan.

Maunt maydonni o‘z oyog‘ida tark etgan, biroq o‘yindan chiqarilayotgan paytda «Manchester Yunayted» tibbiy shtabi a’zolari bilan suhbatlashgan.

«Manchester Yunayted» shanba kuni kechqurun Irlandiyaga yetib borib, Kilder grafligidagi Karton-Xaus bazasiga joylashgan.

Jamoa 12 avgust, chorshanba kuni «Lids Yunayted»ga qarshi nazorat uchrashuviga tayyorgarlik ko‘rmoqda. Bahs Dublindagi «Krok-Park» stadionida o‘tkaziladi va Toshkent vaqti bilan 23:30 da boshlanadi.