«Nyukasl» Portugaliyaning «Benfika» klubida to‘p surayotgan qanot himoyachisi Amar Dedich bilan shartnoma imzolashga yaqin. Bu haqda nufuzli insayder Fabrisio Romano xabar bermoqda.
Manba ma’lumotlariga ko‘ra, «qarg‘alar» bosniyalik futbolchi bilan shaxsiy shartnoma shartlari bo‘yicha kelishib olishgan. Klublar o‘rtasidagi muzokaralar ham yakuniy bosqichda — transfer summasi 30 million yevroga baholanmoqda.
Dedich o‘tgan yozdan beri Portugaliyada o‘ynab kelmoqda. O‘tgan mavsumda 23 yoshli futbolchi barcha musobaqalarda 45 ta o‘yinda maydonga tushib, 1 ta gol urdi va 5 ta rezultativ uzatmani amalga oshirdi.
