Karim Benzemaning «Al-Hilol» bilan tuzilgan shartnomasi bekor qilinishi mumkin. Saudiya klubi yangi top-hujumchini sotib olish uchun fransuz futbolchisi bilan xayrlashishga tayyor. Benzemaning «Al-Hilol»dagi kelajagi jiddiy so‘roq ostida qolmoqda, deb xabar beradi ijtimoiy tarmoqlarda indykaila News.
Manba ma’lumotiga ko‘ra, «Al-Hilol» Benzema bilan shartnomani ikki tomonlama rozilik asosida bekor qilishi mumkin. Klub boshqa kuchli hujumchi bilan kelishuvga erishsagina ushbu qadamni tashlaydi. Buning sabablaridan biri — «Galatasaroy» forvardi Viktor Osimxenga bo‘layotgan qiziqishdir.
Benzema «Al-Ittihod»dan ketgach, 2026 yilning fevral oyida rasman «Al-Hilol»ga o‘tgan edi. U professional faoliyatini «Lion»da boshlagan, so‘ng 2009 yilda «Real Madrid» bilan shartnoma imzolab, u yerda 14 mavsum o‘tkazdi va 25 ta sovrin, jumladan 5 ta Chempionlar Ligasi titulini qo‘lga kiritdi. 2022 yilda Benzema «Oltin to‘p»ga sazovor bo‘ldi. 2023 yilning yozida u Madridni tark etib, faoliyatini «Al-Ittihod»da davom ettirdi va «Al-Hilol»ga o‘tishdan oldin ushbu klub bilan Saudiya Arabistoni chempionati va Kubogini qo‘lga kiritdi.
