«Liverpul» bosh murabbiyi Andoni Iraola jamoaning mavsum oldi yig‘inlari doirasidagi o‘yinlariga baho berdi. Ma’lumot uchun, mersisaydliklar o‘rtoqlik bahslarida «Lids Yunayted» (2:4) va «Monako»ga (2:3) imkoniyatni boy berishgan edi.

«Natijaga qaramay, o‘tgan dam olish kunlarida «Monako»ga qarshi kechgan o‘yin menga va shtabimga juda ko‘p ijobiy jihatlar hamda foydali tajriba berdi. Birinchi bo‘limni, ayniqsa dastlabki 30 daqiqani juda sifatli o‘tkazdik. Aleksander Isakning gol urganini ko‘rish yoqimli bo‘ldi, to‘p bilan ham, to‘psiz ham juda ko‘p yaxshi vaziyatlarni ko‘rdim.

Chikagodagi «Lids»ga qarshi o‘yinda bo‘lgani kabi asosiy muammomiz — o‘yin darajasini baland ushlab tura olmaganimizda bo‘ldi. Bunga faqat vaqt o‘tishi va mashg‘ulotlardagi tinimsiz mehnat evaziga erishish mumkin. Maydonda qanday jamoani ko‘rishni istayotganim, bizga qanday intensivlik, fidoyilik va energiya zarurligi haqida ko‘p gapirganman. Hali yaxshilashimiz kerak bo‘lgan jihatlar juda ko‘pligi aniq, ammo to‘g‘ri yo‘nalishda ketayotganimizga ishonaman. Mavsum yaqinlashgani sari bu ijobiy o‘sish davom etishini kutmoqdaman», — dedi Iraola mersisaydliklarning rasmiy saytiga.