"Real" darvozabonlar murabbiyi Luis Lyopis Madrid klubini tark etdi. AS ma’lumotiga ko‘ra, yangi bosh murabbiy Joze Mourinyo 61 yoshli mutaxassisni o‘z shtabida olib qolmaslikka qaror qilgan.

Portugaliyalik murabbiy darvozabonlar bilan ishlash uchun o‘zining ko‘p yillik hamkori Nunu Santushni olib kelgan. Mourinyo va Santush qariyb 20 yildan beri birga ishlab keladi. Lyopisning klubda boshqa vazifada qolishi imkoniyati ham muhokama qilingan, ammo yakunda tomonlar hamkorlikni to‘xtatgan.

Lyopis "Real"ning asosiy jamoasida jami sakkiz mavsum faoliyat olib borgan. U Keylor Navas va Tibo Kurtua kabi darvozabonlar bilan ishlagan va klubdagi so‘nggi davri 2021 yilda Karlo Anchelottining qaytishi bilan boshlangan edi. Keyinchalik u Xabi Alonso va Alvaro Arbeloa shtablarida ham ishini davom ettirgan.

Mourinyo esa "Real" murabbiylar shtabida jiddiy o‘zgarishlarni amalga oshirmoqda. Shu bilan birga, jismoniy tayyorgarlik bo‘yicha mutaxassis Antonio Pintus klubda qolgan, ammo uning vazifasi avvalgidan farq qiladi.