«PSJ» tayanch yarim himoyachisi Vitinya Fransiya Superkubogi uchrashuvi yakunlariga to‘xtaldi. Uning jamoasi 45 daqiqa davomida bir kishi ko‘p bo‘lib o‘ynaganiga qaramay, «Lans»ga 0:1 hisobida imkoniyatni boy berib qo‘ydi. O‘yin tugashiga oz fursat qolganda tarkiblar tenglashgan edi.
«Biz juda yaxshi o‘yin o‘tkazdik, ayniqsa birinchi bo‘limda. Ular birinchi imkoniyatdan foydalanib gol urishdi, buning ustiga gol juda tasodifiy chiqdi. Biz ko‘plab vaziyatlar yaratdik, ammo ulardan foydalanishda aniqlik yetishmadi. Juda achinarli holat, chunki biz barcha sovrinlarni qo‘lga kiritishni istaymiz. Bugun mayus kun, ammo ko‘rsatgan o‘yinimizdan faxrlanamiz. Shunchaki gol urishimiz kerak edi, ammo futbolda shunaqasi ham bo‘lib turadi», — deydi futbolchi RMC Sports nashriga.
«PSJ» navbatdagi o‘yinini 23 avgust kuni o‘tkazadi. Fransiya chempionatining 1-turida parijliklar o‘z maydonida «Renn»ni qabul qiladi.
